حاضر ايدرلر شويله كه كمى مثال بر عظيم نسنه يايوب ايچنى طپراق ايله طولدررلر و بيوكلك و بلنده لكده مناره‌كبى بنا ايدرلر و متانت و لطافتده اولولايتد نغيرى بر يرده اولميوب و هيج بر ديار خلقى انك كبى بنايه قادر دكللردر و هرنه كه بو كتابده ذكر اولنمشدر اكثرى عبرت و حكمتدر و سابقا ذكر اولنمشديكه نيجه انلر ولايت چينك كذركاهلرنده دشمنده اولان حندقلرى دروننده سير و سفر ايدوب كتدك نيجه بيك ييل بوقدر عسكرى ايشلرى اولمديغى وقت معطل اوتورميوب عمرلرينى خندق قازمغه صرف ايتمشلر در و ايدرلر طول و عرضى نمقدار ايدوكى حد و حصردن بيرون اولديغى ظاهر و باهر در فصل ممالك چينك تواريخندن منقولدر كه اون اوج بيك ييلده ولايت چين بوكماله ايرمشدر زيرا كيجه و كوندز بلكه هر ساعتده و در جه عندلرنده محسوب و مضبوطدر مثلا بشيوزييله بيك ييل ديرلر زيرا انلر كيجه و كوندوزمى بشقه حساب ايدرلر ذكر اولان اسلوب اوزره بيك ييللرينه بر قرن ديرلر و اصل بناى چين اون اوچ قرن اولوب برقرنلرى حسابنجه بيك بيلدر ديرلر دليللرى بو كه ممالك چين اون اوچ قسم اولوب هر قسمى بيك ييلده معمور اولمشدر ديرلر و اول ولايتك معمور اولمسنك اصلى بودر كه اول حالده خطاييلر از اولمغله بر كوشه دنيايى اختيار ايتديلر زيرا كه هابلى قابل اولدر دكده كافر اولوب اولادى دخى كافر اولدى و حضرت ادم عليه السلام قابلى و اولادنى قتل ايتمك قصد ايتدكده خوفلرندن قاچوب مشرق طرفنه كتديلر و غايت خوفلرندن وسط ارضده تمكن ايده‌ميوب تا انقطاع عرضه يعنى ارض چينه كه جانب شرقى و جنوبيسى دريا و غربى و شماليسى صحرا در و اول محله واروب قرار ايتمك مراد ايتديلر و اتفاق ايلديلر كه بزه مسكن و بر جاى حصين لازمدر كه اوزريمزه اعداكلدكده ظفر بولميه و تدبير ايلديلر كه ايكى جانبمز دريا و ايكى طرفمز صحرا در دريا جانبندن خود دشمن كله مز جانب بردن كركدر كه خندق قازوب بنا ايده‌لم اكر دشمن كلور ايسه مالمزه و كشت و كزار مزه و كارمزه فرصت و ظفر بولميه‌لر بونك اوزرينه كنار دريادن ابتدا ايدوب طولى اوج ايلق و عرضى بر ابلق مقدارى مسافه خندق كسمكه و ديوار ياپمغه باشيلوب بر قرن كه انلرك حسابنجه بيك بيلدر اول زمينده خندق و ديوار و شهر و حصارلر بنا ايتمكه قدرتلرينى صرف ايدوب اول اقليمى معمور و ابادان ايلديلر قرن ثانيده دخى